Egun ederra atzokoa. Zumaiako
Santiago hondartzan izan ginen. Bainutxoa egin aurretik bueltatxo bat eman nuen Getariaraino. Hondartza ondotik irteten den porlanezko pista hartu eta berehala aldapa gogorra igo behar da. Baina lehen eragozpen hori gainditu ondoren, aurretik geratzen den bidea zoragarria da. Ederra dago inguru hori orain, mahastiak berde-berde daude une honetan eta tarteka-tarteka bidea lore politaz apaindua dago.
Ordekatik aurrera eginez, Donostiatik hasi eta ia Mutrikuraino, Gipuzkoako kostaldearen bista zoragarri ikus daiteke. Behin Meagas-eko gainara heldu ondoren, errepidetik beherantz egin beharko dugu tartetxo batean. Bihurgune batean, mahastien artean galtzen den pista bat hartu eta Getariako kanposantura helduko gara. Bertatik ezkerrera hartu eta Akarregi-Txiki eta Gaintzako txakolindegien ondotik, Askizuko auzora doan erromatar galtzada hartu beharko dugu. Bertatik Donejakueko bidea egiten ari ziren erromes askorekin topatu nintzen.
Bideak Askizuko auzora eramango gaitu zuzen-zuzenean. Bertako seroretxea pasa ondoren, ezkerrerantz egingo dugu, elizako plaza zeharkatuz. Egarria asetzeko iturri zoragarria dago bertan, ur txorrota ederra botatzen duena. Nekazalturismo-etxe baten ondotik pasatuko gara. Aurrera eginez, bueltatxoaren hasieran hartu dugun bidegurutzera helduko gara. Bertatik, hondartzara jaitsiko gara berriro ere.
Behin hondartzan, bainua egiteko unea. Fresko xamar zegoen ura atzo baina, lehenengo inpresioa gainditutakoan, gustura hartu nuen bainutxoa. Mokadutxo bat jan eta siestatxo bat.
Eguna amaitzeko Legorretako
Bartzelona nekazalturismo-etxean afaldu genuen. Giro paregabea zegoen bertan. Egunen batean inguruan baldin bazabiltzate, bertatik pasatzea gomendatzen dizuet. Haragia bertakoa da eta benetan, goxoa prestatzen dute parrillan nahiz labean.
0 Comments